Act 12 | BOJ | STEP | Bati deqa Mandor Koba Herot a na Yesus aqa tamo uŋgasari qudei naŋgi ojeleŋosiqa ugeugeinjrej.

Acts 12

Herot na Jems qalsiq moinaqa a olo Pita ojsiqa tonto talq di waiyej

1 Bati deqa Mandor Koba Herot a na Yesus aqa tamo uŋgasari qudei naŋgi ojeleŋosiqa ugeugeinjrej. 2 Osiqa qaja tamo bei qariŋyonaqa gilsiqa Jon aqa was Jems serie na qalnaq moiej. 3 A degyonaqa Juda tamo kokba naŋgi tulaŋ areboleboleinjrej. Onaqa Herot a di qalieosiqa naŋgo are boletetnjrqajqa deqa olo Pita ojej. Bati di Juda naŋgo bem tiyosai qaji uyqajqa yori bati koba. 4 Herot a Pita ojsiqa tonto talq di waiyej. Osiqa qaja tamo 16-pela naŋgi minjrnaqa naŋgi tonto talq dia Pita taqatesoqneb. Herot a endegsi are qalej, “Juda naŋgo yori bati koba ñam Pasova di koboamqa e Pita osiy Juda tamo uŋgasari naŋgo ulatamuq dia tigeltqai.” 5 Pita a tonto talq di sonaqa Yesus aqa tamo uŋgasari naŋgi siŋgila na Pita qa pailyoqneb.

Laŋ aŋgro bei bosiq Pita tonto talq dena oqeq atej

6 Ariya Herot a marej, “Nebeamqa e na Pita osiy Juda naŋgo ulatamuq di tigeltqai.” Herot a degsi marej. Deqa qolo di qaja tamo aiyel na Pita osib tonto tal miligiq dia warum beiq di waiysib ambletosib sil kokba aiyel na tontonab ŋeiesoqnej. Qaja tamo qudei naŋgi tonto tal siraŋme jojomq di tigelesosib taqatoqneb. 7 Onaqa qolo qujai di Tamo Koba Qotei aqa laŋ aŋgro bei a warum miligiq di brantoqujatej. Aqa riaŋ na warum di tulaŋ suwantej. Onaqa laŋ aŋgro dena Pita jar baŋgaq di kontosiqa dudumyej. Dudumyosiq minjej, “Ni tigeloqujat.” Degsi minjnaqa sil kokba aiyel Pita aqa baŋ qoseb qaji di pambloŋosib uloŋeb. 8 Onaqa laŋ aŋgro na olo Pita minjej, “Ino gara tigsim ino siŋga tatal jige.” Onaqa Pita a degyonaqa olo minjej, “Ino gara jugo dego jigsim e daurbe.” 9 Degsi minjnaqa Pita a warum di uratosiq laŋ aŋgro di dauryosiq gilej. Laŋ aŋgro a bole Pita tonto talq dena oqeq atej di Pita a poiyosai. A are qalej, “E ŋeiobilqeionum kio?” 10 Naŋgi warum di uratosib walwelosib qaja tamo bei tonto tal taqatesoqnej qaji di buŋyosib gilsib olo qaja tamo bei buŋyosib siraŋme kobaquja ain na gereiyeb qaji di brantonab siraŋ a segi waqonaqa naŋgi aiyel oqedeb. Siraŋme di tonto talq dena oqedosim qureq aiqajqa siraŋme. Naŋgi siraŋme dena oqedosib gam dauryosib giloqnsib laŋ aŋgro na Pita uratosiq ulaŋej.

11 Onaqa Pita a poiyonaqa marej, “Bole. Endego e qalieonum, Juda tamo kokba naŋgi na e lubqa laqnabqa Tamo Koba Qotei na aqa laŋ aŋgro qariŋyqoqa bosiq e aqaryaibosiqa Herot aqa baŋq dena e oqo.” 12 Pita a degsi poiyonaqa walwelosi gilsiq Jon aqa ñam bei Mak aqa aniqali Maria aqa talq di brantej. Tal miligiq dia tamo uŋgasari gargekoba naŋgi koroesosib Pita qa pailyoqneb. 13 Onaqa Pita a tal meq di brantosiqa siraŋmeq di tigelosiq kindokindoŋosiq maeqnaqa wau uŋa bei aqa ñam Roda a bosiqa siraŋ waqtqa osiqa Pita aqa kakoro qusiq tulaŋ areboleboleiyej. Onaqa a siraŋ waqtqa uratosiqa olo urur ti warum miligiq gilsiqa naŋgi minjrej, “Pita bqo agi tal meq di tigelejunu!” 15 Onaqa naŋgi na minjeb, “Ni nanarionum. Di Pita sai.” Degsi minjnabqa a tulaŋ siŋgilaosiqa minjrej, “E nanariosai. E bole maronum. Pita a bqo aqa kakoro quonum.” Onaqa naŋgi na minjeb, “Di Pita sai. Di aqa laŋ aŋgro kio?”

16 Onaqa Pita a siraŋmeq di tigelesosiqa kindokindoŋeqnaqa naŋgi kalil bosib siraŋ waqtosib Pita uneb. Unsib tulaŋ prugeleŋeb. 17 Onaqa Pita a aqa baŋ soqtosiqa naŋgi anjam marqa getentnjrnaqa naŋgi kirionabqa Tamo Koba Yesus na tonto talq dena oqeq atej deqa naŋgi sainjrej. Osiqa minjrej, “Niŋgi gilsib Kristen was kalil Jems ombla endegsib minjriye, ‘Pita a tonto talq dena oqedqo.’” Pita a naŋgi degsi minjrsiqa naŋgi uratnjrsiq tal beiq gilej.

18 Ariya nebeonaqa qaja tamo tonto tal taqatesoqneb qaji naŋgi ŋam ateb Pita a tonto talq di sosai degsi unsibqa naŋgi tulaŋ ulaugetosib are koba qaloqnsib maroqneb, “Pita a qabitqo?” 19 Onaqa Herot a na aqa qaja tamo qudei naŋgi minjrej, “Niŋgi tonto talq gilsib Pita osib boiye.” Degsi minjrnaqa naŋgi tonto talq gilsib Pita qa ŋamonab ugeinjrej. Ugeinjrnaqa olo puluosib aisib Herot minjeb. “Pita a tonto talq di sosai.” Degsib Herot minjnabqa a segi gilsiq qaja tamo tonto tal taqatesoqneb qaji naŋgi nenemnjrnaqa minjeb, “Pita a qabitqo kio di iga qaliesai.” Naŋgi degsib Herot minjeb deqa a na aqa qaja tamo qudei naŋgi minjrej, “Naŋgi Pita geregere taqatosai deqa niŋgi na naŋgi ñumib moreŋqab.” Osiqa bunuqna Herot a Judia sawa uratosiqa Sisaria qureq aisiq di soqnej.

Herot a moiej

20 Herot a nami Tair qure ti Saidon qure ti naŋgi qa ŋiriŋugetej. Deqa tamo uŋgasari qure aiyel dia soqneb qaji naŋgi koroosib mareb, “Iga tamo qudei qariŋnjrimqa naŋgi Sisaria qureq aisib Herot aqa are latetqab. Yimqa aqa ŋiriŋ koboqas.” Naŋgi degsib marsib tamo qudei qariŋnjrnabqa naŋgi aisib Herot aqa talq di brantosib tal taqato tamo aqa ñam Blastus endegsib minjeb, “Ni na Herot minjim a odimqa iga a ombla qairqom. Yimqa aqa ŋiriŋ koboqas.” Tair qure ti Saidon qure ti naŋgi na sawa Herot a taqatoqnej qaji dena iŋgi awaiyoqneb. Utru deqa naŋgi na Herot aqa ŋiriŋ kobotqajqa mareb. Onaqa Blastus a naŋgo anjam di qusiqa gilsiq Herot minjej.

21 Minjnaqa Herot a qusiqa odosiqa naŋgi koba na qairqajqa bati atej. Ariya bati brantonaqa naŋgi gilsib koroonabqa Herot a bosiqa naŋgi anjam bei minjrqa osiqa mandor kokba naŋgo wala jigsiqa aqa awo jaram kobaq di awoosiq naŋgi anjam minjroqnej. 22 Minjreqnaqa tamo uŋgasari koroesoqneb qaji naŋgi aqa anjam di quoqnsib naŋgi tulaŋ areboleboleinjrnaqa leleŋosib maroqneb, “Herot a mandam tamo sai. A dego qotei bei. Deqa a anjam degsi mareqnu.” 23 Herot aqa kumbra dena a Qotei aqa ñam soqtosai. Aqa segi ñam soqtoqnsiqa anjam maroqnej. Deqa Tamo Koba Qotei a Herot qa ŋiriŋosiqa aqa laŋ aŋgro bei qariŋyonaqa urur aisiq Herot a ma uge yonaqa aqa bi ani ambli na uynab a moiej.

24 Ariya bati deqa Tamo Koba Yesus aqa anjam tulaŋ kobaoqnsiqa qure kalil keretoqnej.

25 Onaqa Barnabas wo Sol wo naŋgi Jerusalem dia naŋgo wau kobotosib olo puluqa laqnsib Jon aqa ñam bei Mak a osib koba na Antiok qureq gileb.